Dagskrá

GJÖFIN FRÁ AMY ENGILBERTS

GÆÐASTUNDIR Í LISTASAFNI ÍSLANDS

  • 13.3.2019, 14:00 - 15:00, Listasafn Íslands

13. MARS KL. 14

GJÖFIN FRÁ AMY ENGILBERTS

Leiðsögn um sýninguna Gjöfin frá Amy Engilberts.
Kaffi og bakkelsi frá Brauði og Co í fallegu umhverfi.

Umsjá: Dagný Heiðdal, listfræðingur 

Gæðastundir í Listasafni Íslands. 
Dagskráin er ætluð eldri borgurum og er samsett af sérsniðnum leiðsögnum og spjalli við sérfræðinga safnsins um myndlist, yfirstandandi sýningar og starfsemi Listasafns Íslands. 

Viðburðirnir skapa tækifæri fyrir gesti til að nálgast myndlistina og menningararf þjóðarinnar á margvíslegan hátt. Ávallt er boðið upp á kaffi og meðlæti á gæðastundum í Listasafni Íslands. Bakkelsið er í boði Brauðs og Co sem styrkir verkefnið.

Hámarksfjöldi gesta á hverjum viðburði er 25 manns.
Hægt er að skrá sig á staka viðburði með því að senda póst á netfangið mennt@listasafn.is eða í síma 515 9600.

Aðgangseyrir á safnið gildir. 
Frítt fyrir meðlimi Selmuklúbbsins. 

Nánari upplýsingar um viðburðina má finna á heimasíðu Listasafns Íslands, www.listasafn.is

Tengiliður dagskrár: Ragnheiður Vignisdóttir 
ragnheidur@listasafn.is




GJÖFIN FRÁ AMY ENGILBERTS

Orðið velunnari heyrist ekki oft í umræðunni þegar fjallað er um safnkost listasafna. Velunnarinnkemur þó ósjaldan við sögu í starfsemi þeirra og framlag hans er órjúfanlegur þáttur í sögu uppbyggingar safneignar Listasafns Íslands. Amalie Engilberts var einn fjölmargra velunnara safnsins. Hún var dóttir Jóns Engilberts listmálara og Tove Engilberts, fædd árið 1934 í Danmörku og lést í desember árið 2007. Amalie, eða Amy eins og hún var jafnan kölluð, var vinsæl spákona hér á landi og fékkst við dulspeki í fjölda ára, og þeir sem þekktu hana lýstu henni sem vel lesinni heimskonu.

Þegar Amy lést ánafnaði hún af rausnarskap Listasafni Íslands fjármuni til kaupa á nýjum verkum í safneign safnsins. Safnið hefur hlotið dánargjafir áður, en þetta var í fyrsta sinn sem slíkri gjöf var ætlað að auka við safneignina með skipulögðum hætti. Með gjöfinni fylgdu skilyrði um það hvernig fénu skyldi ráðstafað: til kaupa á nýrri íslenskri myndlist næstu tíu árin, ásamt sýningu á þeim að þessum tíu árum liðnum. Þannig vildi Amy heiðra minningu föður síns.

Verkin sem innkaupanefnd Listasafns Íslands hefur keypt undanfarin tíu ár úr sjóði Amy endurspegla þann fjölbreytileika sem er ríkjandi hjá starfandi listamönnum í dag. Nokkrar innkaupanefndir hafa komið að því að velja verk til kaups og er þetta safn verka áhugavert þversnið listamanna sem eiga mislangan starfsaldur að baki.

Verk eftirfarandi listamanna eru á sýningunni:

Bjarki Bragason, Brynhildur Þorgeirsdóttir, Eygló Harðardóttir, Guðmundur Thoroddsen, Helgi Þórsson, Hildigunnur Birgisdóttir, Hulda Vilhjálmsdóttir, Jeannette Castioni, Jón Axel Björnsson, Magnús Helgason, Pétur Thomsen, Sigga Björg Sigurðardóttir og Þórdís Aðalsteinsdóttir.