Tónleikaröðin Freyjujazz í Listasafni Íslands. Freyjujazz var á í hádeginu á þriðjudögum á síðasta ári en hefur nú fært sig yfir á fimmtudaga frá kl 17:15 -18:00.
Fimmtudagurinn 25. október kl. 17:15
Söngkonan og gítarleikarinn Brynhildur Oddsdóttir. Brynhildur hlaut Gullnöglina í ár, gítarverðlaun sem veitt eru í tengslum við gítarhátíð Björns Thoroddsen, fyrir áræðni, kjark og þor í tónlistarsköpun sinni. Á Freyjujazz mun hún leika djass úr ýmsum áttum ásamt Söru Mjöll Magnúsdóttur píanista og Birgi Bragasyni kontrabassaleikara.
Brynhildur hóf tónlistarnám sitt ung á fiðlu í Nýja tónlistarskólanum, auk þess sem hún lærði síðar söng við sama skóla. Fiðlan vék síðar fyrir rafmagnsgítarnum sem hefur verið hennar aðalhljóðfæri síðan. Árið 2011 lauk Brynhildur námi í tónsmíðum og framhaldsprófi í klassískum söng frá Listaháskóla Íslands og fór í framhaldi af því í nám í FÍH bæði í djasssöng og rafgítarleik. Árið 2010 stofnaði hún hljómsveitina Beebee and the bluebirds og hefur gefið út tvær plötur með henni og spilað á hinum ýmsu tónlistarhátíðum bæði hérlendis og erlendis.
Tónleikarnir eru á efstu hæð safnsins og er aðgangseyrir 1800 kr. Barinn verður opinn.