TENGINGAR - SIGURJÓN ÓLAFSSON OG NOKKRIR SAMFERÐAMENN HANS

  • 20.10.2018 - 6.10.2019, Listasafn Sigurjóns Ólafssonar

Tengingar  –  Sigurjón Ólafsson og nokkrir samferðamenn hans

Í tilefni þess að þann 21. október 2018 eru liðin 30 ár frá því að Listasafn Sigurjóns Ólafssonar var opnað almenningi, er efnt til sýningar þar sem fjórtán myndlistarmenn, sem allir tengdust Sigurjóni og list hans með einum eða öðrum hætti, eiga samtal við verk Sigurjóns í fyrrum vinnustofu hans.

Listamennirnir eru Erlingur Jónsson, Gerður Helgadóttir, Gestur Þorgrímsson, Guðmundur Benediktsson, Guðmundur Elíasson, Hallsteinn Sigurðsson, Helgi Gíslason, Jón Benediktsson, Kristín Jónsdóttir frá Munkaþverá, Páll Guðmundsson frá Húsafelli, Svava Björnsdóttir, Sverrir Haraldsson, Tove Ólafsson og Örn Þorsteinsson.

Einkenni þeirra allra er ástríðan fyrir handverkinu, öll unnu þau að því markmiði að skapa rýmisverk, höggmyndir úr stein, eða þrívíð verk úr málmi, tré, pappír eða textíl.

Sýningunni fylgir myndskreytt sýningarskrá á ensku og íslensku þar sem Aðalsteinn Ingólfsson listfræðingur skoðar verkin í stærra samhengi og fjallar um persónuleg tengsl Sigurjóns og þessara listamanna.  Má vera að sumir þeirra hafi horft til Sigurjóns sem fyrirmyndar eða lærimeistara, en verk þeirra vitna einnig um að þeir tóku mið af hræringum í alþjóðlegri myndlist og miðluðu hingað heim. Það er mikill fengur að þessari úttekt Aðalsteins Ingólfssonar á íslenskri höggmyndalist allt frá árinu 1946 fram til dagsins í dag.

 
Á efri sal safnsins verður sýning á keramík úr steinleir eftir svissnesku listakonuna Sabine Hasler. Sýninguna nefnir hún Ísland – landslag og litir. Sabine Hasler hefur tengst safninu og aðstandendum þess vináttuböndum um áratuga skeið og árið 1993  hannaði hún og gerði bollastell úr ljósum steinleir fyrir kaffistofuna, prýtt merki safnsins. Síðan hefur hún oft komið til Íslands og á sýningunni birtast hughrif hennar frá íslenskri náttúru í glerjung og keramík.  Málverk eftir Björgu Þorsteinsdóttur lýsir upp stigaganginn og tengir sýningar nar tvær.

 

Sýningarstjóri: Birgitta Spur