• Nátttröllið á glugganum

KORRIRÓ OG DILLIDÓ

Þjóðsagnamyndir Ásgríms Jónssonar

  • 2.2.2018 - 29.4.2018, Listasafn Íslands

Ævintýrin gerast enn! Myndheimur íslenskra þjóðsagna og ævintýra sem Ásgrímur Jónsson skapaði með verkum sínum er sannkallaður töfraheimur. Álfar, tröll og draugar, sem lifað höfðu með óljósum hætti í hugskoti þjóðarinnar í rökkri baðstofunnar, tóku á sig skýra mynd í verkum Ásgríms, en hann sýndi slík verk í fyrsta sinn á Íslandi árið 1905.

Þjóðsagnamyndir Ásgríms fengu góðan hljómgrunn og í blaðaskrifum um sýninguna má lesa að menn fagna því að í fyrsta sinn hafi íslenskur listmálari tekist á við að túlka þjóðsögurnar. Mikil sátt virðist hafa ríkt um útlit álfa og trölla í meðförum Ásgríms, svo ætla má að listamanninum hafi tekist að fanga þá mynd sem landsmenn höfðu skapað í huga sér af þessum fyrirbærum.

Sýningin Korriró og dillidó er kærkomið tækifæri fyrir alla fjölskylduna til að kynnast þeim einstaka ævintýraheimi skrautbúinna álfa og ógnvekjandi trölla sem Ásgrímur Jónsson túlkaði af mikilli einlægni og ástríðu. Áhersla er lögð á að virkja ímyndunarafl gesta og gefa þeim kost á að njóta þessa menningararfs sem um margt getur varpað ljósi á ótta, drauma og þrár genginna kynslóða og sambúð þeirra við ógnvekjandi náttúru landsins.

Í safneign Listasafns Íslands eru rúmlega 1.000 verk sem tengjast efni þjóðsagna og ævintýra og í teiknibókum Ásgríms Jónssonar eru yfir 2.000 teikningar sem að stórum hluta sækja myndefni í þennan sagnabrunn. Á sýningunni má sjá fjölmörg lykilverk úr því fjölbreytta safni þjóðsagnamynda sem Ásgrímur Jónsson lét eftir sig, bæði olíu- og vatnslitamálverk auk fjölmargra teikninga, þ. á m. túlkun á sögunum Átján barna faðir í álfheimum, Una álfkona, Tungustapi, Nátttröllið, Gissur á botnum, Búkolla, Mjaðveig Mánadóttir, Sagan af Hringi kóngssyni, Surtla í Blálandseyjum, Djákninn á Myrká og „Horfðu í glóðarauga mitt, Gunna“


LISTAMAÐUR / ARTIST : ÁSGRÍMUR JÓNSSON


Sýningarnefnd og höfundar texta / Exhibition committee and authors
Birta Guðjónsdóttir, Dagný Heiðdal, Ragnheiður Vignisdóttir, Rakel Pétursdóttir

Uppsetning sýningar og lýsing / Installing of exhibition and lighting:
Baldur Geir Bragason, Geirfinnur Jónsson, Hrafnhildur Guðmundsdóttir

Umsjón með íslenskum texta / Editor of Icelandic text: Gerður Gunnarsdóttir
Ensk þýðing / English translation: Anna Yates

Ljósmyndun listaverka / Photos of artworks: Sigurður Gunnarsson
Forvarsla / Conservation: Ólafur Ingi Jónsson

Upplestur / Reading: Silja Aðalsteinsdóttir, Sólveig Hauksdóttir, Terry Gunnell
Hljóðvinnsla / Sound editing: Sigurður Gunnarsson

Grafísk hönnun / Graphic Design: Arnar Freyr Guðmundsson

Álfakirkja, hönnun og smíði / Elf church, design and construction: Þorvaldur Böðvar Jónsson

Ráðgjöf við útfærslu á leikmynd / Advice on scenography: Ilmur Stefánsdóttir

Hönnun fræðsluefnis fyrir fjölskyldur / Designer of the family guide: Helga Gerður Magnúsdóttir 

Mynd: Nátttröllið á glugganum, 1950–1955. LÍÁJ 311.