Dagskrá

BERANGUR - LEIÐSÖGN SÝNINGARSTJÓRA

  • 31.1.2021, 14:00 - 15:00, Listasafn Íslands

Berangur – Leiðsögn sýningarstjóra
31. janúar kl. 14

Leiðsögn sýningarstjóra um sýninguna Berangur þar sem sýnd verða lykilverk eftir Georg Guðna Hauksson (1961-2011) frá árunum 2006–2011.

ATH: Vegna samkomutakmarkana er nauðsynlegt að skrá sig á viðburðinn með því að hringja í síma 515-9600.


Listasafn Íslands efnir til sýningar á verkum Georgs Guðna (1961 – 2011). Á sýningunni má sjá úrval landslagsmálverka listamannsins frá síðustu starfsárum hans.

Vorið 2004 keypti Georg Guðni sér landspildu þar sem hann átti síðar eftir að reisa sér heimili og vinnustofu. Landspildunni var gefið nafnið Berangur og að vissu leyti má líta á hana sem hans síðustu landslagsmynd. Nafngiftin var vel til fundin, því þar svipar öllu náttúrufari til þeirra staðhátta sem okkur eru svo kunn af verkum hans.

Eftir á að hyggja vaknar sú áleitna spurning hvort það hafi verið Georg Guðni sem valdi sér þessa landspildu sem sitt annað heimili eða hvort hugsanlega hafi það verið landspildan sem valdi innri heim listamannsins sem umbúnað tilveru sinnar. Það var á þessu kjörlendi sem Georg Guðni vann að verkum sínum síðustu ár ævi sinnar.

Vera Georgs Guðna á Berangri átti eftir að hafa afgerandi áhrif á þróun hinstu verka hans. Öll bera þau með sér sterkt svipmót þess hrjóstruga eyðilands er einkennir náttúru landsvæðisins í kringum Berangur. Sem fyrr byggja þau á næmu skynbragði og upplifunum Georgs Guðna gagnvart umhverfi sínu. Jafnt frammi fyrir hraunkarlalegum og veðurbörðum harðbalanum, sem stríðum náttúruöflunum allt um kring.

Í verkum sínum fangaði Georg Guðni þennan frumkraft með einkar fínlegum og grípandi hætti. Frammi fyrir þeim er líkt og markalínur andstæðra afla tilverunnar máist út með einu pensilstriki. En undir lágstemmdu yfirbragði síðustu verka hans tók að bera á óþreyjufullum kenndum. Fram komu fyrirboðar óvæntra breytinga er gáruðu yfirborðið. Það var sem eitthvað lægi í loftinu og hæglát veðrabrigðin urðu nú smám saman ágengari.

Á Berangri var líkt og stöðugt drægi saman með listamanninum og landspildunni sem hafði útnefnt hann. Vinnudagarnir urðu sífellt lengri og vart mátti á milli sjá hvort kæmi á undan landið eða myndin af því. Á lofti voru feiknstafir er boðuðu breytingar á lífi hans og list sem ekki varð séð fyrir endann á. En það var einmitt hér á berangrinum sem hin ógnvekjandi draumsýn Georgs Guðna um samruna sinn og náttúrunnar fullkomnaðist.

Flest þeirra verka sem sjá má á sýningunni voru unnin á Berangri á árunum 2006 – 2011. Flest eru í eigu fjölskyldu listamannsins og sum hver hafa ekki áður komið fyrir almenningssjónir.

Georg Guðni fæddist í Reykjavík árið 1961. Hann stundaði nám við Myndlista- og handíðaskóla Íslands 1980 – 1985 og framhaldsnám við Jan Van Eyck Academie í Maastricht í Hollandi 1985 – 1987. Allt frá fyrstu einkasýningu Georgs Guðna í Nýlistasafninu árið 1985 vöktu verk hans eftirtekt íslenskra sem erlendra listunnenda. Á gæfuríkum ferli voru verk hans sýnd víða um lönd og honum hlotnuðust ýmiss konar viðurkenningar fyrir framlag sitt til alþjóðlegrar myndlistar. Verk hans er að finna í öllum helstu listasöfnum hérlendis og árið 2003 efndi Listasafn Íslands til yfirlitssýningar á verkum hans. Georg Guðni varð bráðkvaddur á Berangri árið 2011 einungis 50 ára að aldri.

Samhliða sýningunni gefur Listasafn Íslands út bók sem fjallar um þetta sérstaka tímabil í listferli Georgs Guðna og unnin var sérstaklega í tengslum við sýninguna.

Sýningarstjóri: Einar Garibaldi Eiríksson

Mynd: Georg Guðni Hauksson
I. Án titils, 2011, olía á striga, 200x180 cm.

Ljósmynd: Guðmundur Ingólfsson / Ímynd