Dagskrá

Sunnudagsleiðsögn / Að fanga kjarnann

  • 8.3.2020, 14:00 - 15:30, Listasafn Íslands

Mats Gustafson

Sunnudaginn 8.mars kl.14 leiðir Júlía Marinósdóttir verkefnastjóri sýninga hjá Listasafni Íslands gesti um sýninguna Að fanga kjarnann / Mats Gustafson.


Sænski listamaðurinn Mats Gustafson fangar hverfulleik vatnslitarins af einstakri næmni. Á áttunda áratugnum hóf hann að vinna myndir fyrir tískuheiminn en helgaði sig æ meira eigin listsköpun þegar fram í sótti og hóf að vekja athygli.

Í verkum sínum sveiflast listamaðurinn af mikilli leikni milli tískuheimsins, náttúrunnar og könnunar á umhverfinu. Myndefni verka hans virðast fábrotin: barrtré og steinar í náttúrunni, dádýr, andlitsportrett, tískuhönnun og nekt.

En allt snýst þetta um að fanga fegurðina í sinni fjölbreyttu mynd. Listsköpun Mats er í senn fáguð og óræð. Pensildrættirnir eru nákvæmir, engin mistök leyfð. Ljósi og skugga er dreift líkt og taktvissum slætti á pappírinn. Litirnir renna saman og magna upp form.

Á sýningunni eru öll þekktustu verk Mats sem hann hefur unnið með tískuhúsum á borð við Christian Dior, Comme des garçons, Yohji Yamamoto, Romeo Gigli og Yves Saint Laurent fyrir tímarit eins og Vogue og Harper‘s Bazaar. Einnig varpar sýningin góðu ljósi á vatnslitaseríur hans af náttúru, nekt og portrettum af samferðarfólki hans.

Mats er fæddur árið 1951 og býr og starfar í New York.
Sýningin er unnin í náinni samvinnu við Norræna vatnslitasafnið í Svíþjóð.

Mynd: Mats Gustafson Svört herðaslá (Romeo Gigli), 1990