Ekspanótísk artifisjón af landslagi

Sagt er að Jóhannes Sveinsson Kjarval hafi með verkum sínum kennt Íslendingum að meta fegurðina sem býr í viðkvæmum mosaþembum og úfnu hrauni landsins. Hann var líka óhræddur við að prófa ólíka stíla og nýjar stefnur í verkum sínum og málaði samtímis landslagsmyndir frá Þingvöllum og abstraktverk í anda kúbisma eins og það sem hér er og hann nefnir á sinn skáldlega máta Expanótíska artifisjón af landslagi. Það er þó fátt í verkinu sem minnir á landslag nema þá kannski borgarlandslag, eða hvað? Kjarval kynntist kúbismanum ásamt fleiri framúrstefnum á námsárum sínum í Kaupmannahöfn á öðrum áratug tuttugustu aldar og má víða sjá merki þeirra í fjölbreyttu myndmáli hans.