MUGGUR - GUÐMUNDUR THORSTEINSSON

  • 2.10.2021 - 13.2.2022, Listasafn Íslands

 

MUGGUR

Guðmundur Thorsteinsson 1891–1924

2.10. 2121 – 13.2.2022

Sagt var að allt sem Muggur snerti yrði að listaverki og mótaðist af hinum einstaka persónuleika hans.

Guðmundur Thorsteinsson, alltaf kallaður Muggur, fæddist á Bíldudal 1891, en fluttist ásamt fjölskyldu sinni til Kaupmannahafnar 1903. Hann nam myndlist við Konunglega listaháskólann 1911–1915. Listferill hans að námi loknu spannaði einungis tæp tíu ár, en hann lést úr berklum 1924. Á stuttum ferli náði hann að skapa einstakan og persónulegan myndheim. Stíll hans var natúralískur og frásögn oftar en ekki í fyrirrúmi, verk hans einkennast af fjölbreytileika og leit að listrænu frelsi.

Á sýningunni verður leitast við að gera öllum þáttum myndsköpunar Muggs skil, en hún spannar vítt svið: landslag, sveitasælu og þjóðlíf á Íslandi, ferðaminningar frá framandi stöðum, svo sem sveitalíf í Noregi og skemmtanalíf í New York, þjóðsagna- og ævintýraheim þar sem fíngerðir prinsar og prinsessur dvelja í fögrum höllum, tröllaheima myrkurs og ógnar og náðarheim trúarinnar þar sem Kristur læknar sjúka. Myndskreytingar Muggs við þjóðsögur eru oft með áherslu á skoplegar hliðar þeirra, enda er hann talinn fyrsti húmoristinn meðal íslenskra myndlistarmanna. Hann fann hugmyndum sínum farveg með ólíkum miðlum og aðferðum; teiknaði með blýanti, krít og penna, vatnslitaði, málaði með olíulitum, gerði klippimyndir úr pappír, bróderaði, saumaði og skar út í tré.

Muggur var afar fjölhæfur listamaður, en auk þess að fást við myndlist var hann einnig leikari og söngvari. Hann lék á sviði og söng gamanvísur en einnig lék hann aðalhlutverkið í kvikmyndinni Saga Borgarættarinnar sem frumsýnd var árið 1920.

Verkin á sýningunni eru í einkaeign og úr safneign Listasafns Íslands, en árið 1958 fékk safnið 46 myndverk eftir Mugg að gjöf frá danska listmálaranum og prófessornum Elof Risebye (1892–1961).

Sýningarstjóri er Kristín G. Guðnadóttir 


Sýningarstjóri: Kristín G. Guðnadóttir, listfræðingur

Verkefnastjóri sýningar: Vigdís Rún Jónsdóttir

Sýningarhönnuður: Helgi Már Kristinsson

Textar: Kristín Guðnadóttir

Þýðing: Anna Yates

Markaðsmál: Guðrún Jóna Halldórsdóttir

Umsjón með fræðslu og viðburðadagskrá: Ragnheiður Vignisdóttir

Umsjón tæknimála og ljósmyndum: Sigurður Gunnarsson

Forvarsla: Ólafur Ingi Jónsson og Nathalie Jacqueminet

Uppsetning: Helgi Már Kristinsson og Guðni Gunnarsson, Ísleifur Kristinsson og Sigurður Gunnarsson

Stofnunum og einstaklingum sem eiga verk á sýningunni er sérstaklega þakkað fyrir liðsinnið.



Mynd:
Hin ungu listasystkin /
The Young Artistic Siblings, 1915
Vatnslitamynd / Watercolour,
Einkaeign / Private collection