Gæðastund

Á sýningunni Staðarform teflir sýningarstjórinn Gavin Morrison fram verkum bandaríska listamannins Donald Judd og Harðar Ágústssonar. Í arkitektúrteikningum þeirra kallast á viðleitni tveggja listamanna til að skilja og lýsa byggingalist í sínu nánasta umhverfi.

Frá níunda áratug síðustu aldar sótti Donald Judd Ísland reglulega heim og heillaðist af bókmenntum landsins, landslagi, sögu, list og arkitektúr. Hörður Ágústsson var listamaður, grafískur hönnuður og fræðimaður sem helgaði stóran hluta starfsferils síns rannsóknum og skrásetningu á íslenskri byggingarlist. Í verkunum á þessari sýningu birtist arkitektúrhugsun tveggja arkitekta og listamanna sem báðir kunnu að meta fágaðar og skilvirkar útfærslur sem ríma vel við umhverfi og aðstæður.