Þrettándagleði í Listasafni Einars Jónssonar

Hið stórbrotna Listasafn Einars Jónssonar varð hluti af Listasafni Íslands um áramótin. Þau tímamót skulu markeruð í fyrstu atrennu með þrettándagleði í safngarðinum og inni í safninu.

Snarkandi eldur og glitrandi stjörnuljós verða í garðinum innan um ævintýralegar höggmyndirnar, söngur Kvæðakórsins mun óma og heitir drykkir flæða.

Inni verður boðið til listasmiðju fyrir börn af öllum kynslóðum þar sem töfrasprotar úr birkigreinum og óskastundir verða í forgrunni auk sögustunda á sérhverju korteri þar sem þjóðsögur frá ýmsum löndum verða lesnar.

Opið er á milli heima á þrettándanum og allt verður mögulegt þennan dag og nótt. Töfrandi heimur verka Einars Jónssonar ljáir gestum sýn inn í annan heim og viðburðurinn mun henta vel öllum kynslóðum. Gestir eru hvattir til að koma inn um garðinn.

Dagskrá

17.05 Safnstjóri býður gesti velkomna í garðinum,

17.10 Kvæðakórinn syngur og kveður kvæði í garðinum,

17 – 18.30 Listasmiðja fyrir allar kynslóðir. Töfrasprotar og óskastundir. Jarðhæð,

17.30/45,18.00/15 Þjóðsögur frá ýmsum löndum, sögustundir inni í safninu,

18.30 Kvæðakórinn fer fyrir samsöng í garðinum, stjörnuljós í boði að söng loknum.