Orka

Karl Kvaran var einn aðalfulltrúi strangflatarmálverksins í íslenskri myndlist á sjötta áratugnum. Karl þróaði með sér persónulegan stíl sem einkenndist af samspili línu og litar þar sem stefnt var að æ meiri einföldun myndmálsins og megináhersla lögð á hrynjandi, einkum í bogadregnum línum og hringformum. Verk hans byggja á fastmótaðri formbyggingu þar sem teikningin er aðalatriðið en afgerandi liturinn spennir upp rýmið. Karl var ævinlega trúr abstraktlistinni og var þeirrar skoðunar að hún byði upp á meira frelsi en önnur form.