Hafið

Birgir Andrésson, Birgir Snæbjörn Birgisson, Björg Þorsteinsdóttir, Edvard Munch, Finnur Arnar Arnarson, Finnur Jónsson, Gjörningaklúbburinn, Guðmundur Benediktsson, Gunnlaugur Blöndal, Gunnlaugur Schevings, Halldór Ásgeirsson, Helgi Þorgils Friðjónsson, Hildur Hákonardóttir, Hólmfríður Árnadóttir, Hrafnkell Sigurðsson, Hreinn Friðfinnsson, Jóhannes Kjarval, Jón Stefánsson, Júlíana Sveinsdóttir, Karl Kerúlf Einarsson Dunganon, Kristinn G. Harðarson, Kristín Jónsdóttir, Magnús Sigurðarson, Sindri Leifsson, Valtýr Pétursson

Hafið er umlykjandi á nýrri sýningu á 2. hæð í Safnahúsinu við Hverfisgötu þar sem fjársjóður íslenskrar myndlistar er aðgengilegur.
Gestum gefst nú tækifæri á að upplifa listaverk sem öll tengjast hafinu og orðræðunni um sjálfbærni.

Heimshöfin hafa víðtæk áhrif á líf okkar á jörðinni. Þau eru öll tengd og þau þekja meira en 70% af yfirborði jarðar. Hafið knýr hnattræn kerfi sem gera jörðina vistvæna fyrir mannkynið. Hafið er í lykilhlutverki hvað varðar vatnsbúskapinn á jörðinni því það tekur þátt í hringrás vatns.

Hafið hefur veitt mörgum listamönnum innblástur til listsköpunar. Verkin á sýningunni vísa í ýmsa þætti sem vert er að skoða í samhengi við hafið og hvernig samband manna við hafið hefur breyst. Auðlindir hafsins, baráttan við bárurnar, efling náttúruvitundar, sjálfbærni og síðast en ekki síst undur hafsins eru leiðarstef í sýningunni sem að höfðar til fólks á öllum aldri.

Náttúran byggir á viðkvæmu jafnvægi, raskist það t.d. með hlýnun jarðar getur það haft alvarlegar afleiðingar fyrir líf á jörðinni. Skilningur og þekking eru forsenda þess að geta tekið þátt í að vinna gegn uggvæn­legum afleiðingum af ósjálfbærri hegðun mannsins sem hefur neikvæðar afleiðingar fyrir komandi kyn­slóðir. Forsendur breytinga eru þátttaka allra, sam­vinna og virðing fyrir stað og stund.