Korriró og dillidó
Ásgrímur Jónsson
1.1.2020 — 23.12.2021
![](/_next/image/?url=https%3A%2F%2Fimages.prismic.io%2Flistasafn-islands%2F6846ee97-ca78-4248-9cb1-cc9de18142db_A%25CC%2581Sgri%25CC%2581mur%2BJo%25CC%2581nsson%2B01.jpg%3Fauto%3Dcompress%2Cformat&w=3840&q=100)
Ævintýrin gerast enn! Myndheimur íslenskra þjóðsagna og ævintýra sem Ásgrímur Jónsson skapaði með verkum sínum er sannkallaður töfraheimur.
![](/_next/image/?url=https%3A%2F%2Fimages.prismic.io%2Flistasafn-islands%2Fd2d7e49f-1498-41fa-bf6b-48f0581375b2_LIAJ_01673A.jpg%3Fauto%3Dcompress%2Cformat&w=3840&q=100)
1.1.2020 — 23.12.2021
Sýningarnefnd og höfundar texta
Birta Guðjónsdóttir
Dagný Heiðdal
Rakel Pétursdóttir
Ragnheiður Vignisdóttir
Álfar, tröll og draugar, sem lifað höfðu í hugskoti þjóðarinnar í rökkri baðstofunnar, tóku á sig skýra mynd í verkum Ásgríms, en hann sýndi slík verk í fyrsta sinn á Íslandi árið 1905. Þjóðsagnamyndir Ásgríms fengu góðan hljómgrunn og í blaðaskrifum um sýninguna er því fagnað að í fyrsta sinn hafi íslenskur listmálari tekist á við að túlka þjóðsögurnar. Mikil sátt virðist hafa ríkt um útlit álfa og trölla í meðförum Ásgríms, svo ætla má að listamanninum hafi tekist að fanga þá mynd sem landsmenn höfðu skapað í huga sér af þessum fyrirbærum. Þjóðsagnamyndirnar eru í dag hluti af einstökum menningararfi sem Listasafn Íslands varðveitir.
![](/_next/image/?url=https%3A%2F%2Fimages.prismic.io%2Flistasafn-islands%2F4d166797-b84e-46e2-8e19-d0c96b0e1acc_LIAJ_00872-1.jpg%3Fauto%3Dcompress%2Cformat&w=3840&q=100)
Sýningin Korriró og dillidó á vinnustofu Ásgríms í íbúðarhúsi hans við Bergstaðastræti veitir kærkomið tækifæri til að kynnast þeim einstaka ævintýraheimi skrautbúinna álfa og ógnvekjandi trölla sem Ásgrímur Jónsson túlkaði af mikilli einlægni og ástríðu. Á sýningunni er hægt að hlusta á lestur nokkurra þjóðsagna bæði á íslensku og ensku sem bæði ungir og aldnir, fjölskyldur eða hópar geta notið í þeirri einstöku umgjörð sem heimili listamannsins er.
Í safneign Listasafns Íslands eru rúmlega 1.000 verk sem tengjast efni þjóðsagna og ævintýra og í teiknibókum Ásgríms Jónssonar eru yfir 2.000 teikningar sem að stórum hluta sækja myndefni í þennan sagnabrunn. Á sýningunni í Ásgrímssafni má sjá brot af því fjölbreytta safni þjóðsagnamynda sem Ásgrímur Jónsson lét eftir sig, bæði olíu- og vatnslitamálverk auk teikninga.
Þar á meðal túlkun Ásgríms á sögunum Una álfkona, Nátttröllið, Gissur á botnum, Búkolla, Mjaðveig Mánadóttir, Djákninn á Myrká og „Horfðu í glóðarauga mitt, Gunna“.
![](/_next/image/?url=https%3A%2F%2Fimages.prismic.io%2Flistasafn-islands%2F8482ee46-f833-4efe-960a-4bbef941c2b9_LI_00419_HR.jpg%3Fauto%3Dcompress%2Cformat&w=3840&q=100)
Korriró og dillidó