Úkraínskar helgimyndir í aldanna rás

Úkraínsk íkon veita sýn inn í einstaklega ríkan menningararf. Á þessari sýningu gefst tækifæri til að skoða hann eins og hann birtist í verkum úr safneign Listasafns Úkraínu í Kænugarði. Áherslan er á kristna myndlist í aldanna rás en verkin spanna tímabilið frá lokum 12. aldar til upphafs 19. aldar. Í verkunum má sjá hvernig úkraínsk list dró í upphafi dám af menningu Býsans. Síðar gætti áhrifa frá gotneskri list og endurreisninni. Á barokktímanum tóku nýir straumar að móta þjóðmenningu landsins: Veraldleg myndefni ruddu sér til rúms, litavalið varð djarfara og skreytingarnar íburðarmeiri. Í þróun íkonagerðarinnar speglast jafnframt saga úkraínsku þjóðarinnar.

Að sýningunni standa Listasafn Íslands, Þjóðminjasafn Íslands og Listasafn Úkraínu, og er markmið samstarfsins að efla menningarsamskipti og gagnkvæman skilning milli þjóðanna tveggja.