Einkasafnið

Í upphafi árs 2022 var listaverkasafn hjónanna Ingibjargar Guðmundsdóttur og Þorvaldar Guðmundssonar, sem kenndur er við Síld og fisk, afhent Listasafni Íslands til varanlegrar vörslu. Safnið, sem telur um 1400 verk eftir marga af helstu listamönnum þjóðarinnar, verður skráð sem hluti verka Listasafns Íslands, og verkunum komið á stafrænt form í gagnagrunni sem er almenningi aðgengilegur. Sett verður upp verkstæði og lifandi sýning í sal 3 á efri hæð safnsins þar sem almenningi gefst kostur á að fylgjast með vinnu skráningarteymis safnsins. Samfara því verður í sal 4 haldin sýning á völdum verkum úr listaverkasafninu þar sem sjónum verður beint að dýrum, stórum sem smáum, í íslenskri náttúru.